- وظیفه م ایدی عزت آغا ! منیم اخلاغیم بئله دیر ، سیزدن قاباقکی قونشوموزدا کؤچوب گئدنده ، قونشولارین هامیسی دیسک توتوب الین بئلینه قویوب باخیردیلار آما من یاردیم ائدیب تکیمه کامیونو یوکله دیم ! ایکی گونلوک دونیادیر دااا عزت آغا . آداما یاخشیلیق قالاجاق !
- آللاه ادبینی الیندن آلماسین کیشی !
یئنی قونشو ایله تئز صمیمی اولدوق . بیر ایکی گونون ایچینده گؤروشوب دانیشدیقجا ، عزت آغانین بورجلو دوشوب ائو - ائشییین ساتیب سووماغیندان چوخ اوزولدوم ! هر زاد بیر یانا ، اوغلونون دا تویو هفته سونو اولاجاق ایدی . یاغماسایدیم دا گورولداییب تویدا الیمدن گلن ایشی گؤرمه ییمه سؤز وئردیم کی چوخ دا نیگران اولماسین ، او دا اینانیب توی کارتلارینین پایلاماغین منیم بوینوما قویدو ! البته هله کارتلار آماده دئییلدی ، عزت آغادان چوخ من تله سیردیم ! اؤز دردیمی اؤتوروب اونون فیکرینده قالمیشدیم . آز قالیردی کی هفته چیخسین آما کارتلاردان خبر چیخمامیشدی ، ایشدن تازا یئتیشیب ائوده اوتورموشدوم ، هله چاییمدان بیر قورتوم ایچیب - ایچمه میش قاپیمیز دؤیولدو ! قاپینی آچیب عزت آغانی بیر تلیس الینده قاپیمین آغزیندا گؤردوم !
- سلام عزت آغا ! بو تلیس نه تلیسیدیر ؟
- توی کارتلاریدیر دا . صاباح گئجه اوغلانین تویودور داااااا
- تو . تو . توی کارتلاری ؟ بیر تلیس توی کارتی ؟ بویور ایچری . بویور . بویور . قاپی قاباغیندا پیسدیر .
بیر تلیس توی کارتین گؤردوکده او بیر قورتوم ایچدیییم چایین دا قندی بوغازیما قاچدی ! کیشی نه خبریندیر ؟ اولمایا تبریز اهلینه قوناقلیق وئره جکسن ؟ » دئدیم . عزت آغا منیم کارتیمی وئریب دئدی : بو سنین اؤز کارتین ! بو محله دن یالنیز سنی تانیرام ، سن ده یئنه صلاح بیلدییین قونشونو چاغیرا بیلرسن ! »
- یوووو . من گلسم ائله گؤرر . او بیری کارتلاری نجور پایلامالییق ؟
- چاغیردیغیم قوناقلار ، قدیم قونشولاریم ، زینب طرفی بیرده کی زینال طرفیدیر ! البته قیز ائویندن ده قوناقلاریمیز اولاجاق کی اونلارا دا کارت یازمیشام ! دوزدور هامیسینا زنگ آچیب تویا دعوت ائتمیشم آما رسمدیر توی کارتی طرفین قاپیسینا گئتسین یوخسا وب تویا گلمز !
- بلی . بلی . خولاصه من خیدمتینده یم . دئییرم عزت آغا بیر آز یوباندیریبسان هااااااا . بیر بئله کارتی نجور هامینین الینه یئتیرمک اولار ؟ یالنیز بیر گون واخت وار . اؤزو ده کی من سیزین فار - فامئلین ائولرین تانیمیرام آخی . بیر آز چتین اولاجاق داااااا . اولماسا منه آیری بیر ایش تاپشیریب توی کارتلارین اؤزون پایلا ! منیم صاباح واجیب ایداری ایشم وار ، گئتمه سم ایشیم یانار !
- یوخ دا منیم واختیم یوخدور ، سنین راحاتچیلیغینا خاطیر ائله ایش گؤرموشم کی هامیسی پایلاماسی بئش دقیقه نین ایشیدیر باااا ، کارتلاری پایلاییب گئدیب ایشینه ده یئتیش داااا ، من سنین ال - آیاغینی باغلامامیشام کی ، هر محله نین کارتین بیر باغلاما باغلامیشام ، آدرسی ده اوستونده یازمیشام ، سن هر باغلامی یازدیغیم آدرسه یئتیره جکسن ، طرف اؤزو اؤز کارتین گؤتوروب او بیری کارتلاری دا صاحیبلرینه یئتیره جک ! مثلن بو باغلامدا 56 کارت وار ، بو کارتلار قاباقجی قونشولاریمیزین کارتلاریدیر ، هامیسین " بهشتی " چاهارراهینداکی سیگار ساتانا وئره جکسن ، او کیشی گئجه لر بیزیم قدیم محله نین گؤزتچیسیدیر ، هامینی دا تانیر ، بیله سینه تاپشیرمیشام کی کارتلاری سندن آلیب صاحیبلرینه یئتیرسین !
- آهان . باشا دوشدوم .
- بو باغلام دا " کوی فرهنگیان " آدرسینه گئده جک ، اوچونجو بلوکدا ایلک قاتین زنگین چالیب کارتی باجاناغیم گیله وئره جکسن ، دوزدور باجاناقدان فامئل چیخماز آما بو نئچه کارتین دا صاحیبلرینه یئتیرمه یی او بوینونا آلیب !
- ساغولسون داااا . بو باغلامین دا اوستونده یازیبسان : شریعتی خیاوانی - شاطیر مورتوض .
- آی ساغوووول ! شاطیر مورتوض منیم دوغما - دوغار خالا اوغلومدور ! شریعتی خیاوانیندا یاغلی کوکه پیشیرر ، اورا شولوغ خایاوان اولدوغونا گؤره ، کوکه پیشیرمک ایله یامان اؤزون تاپیب ! توکانیندا اوستون تیکدیریب اوردا اوتورور ، شریعتی ده کیمدن شاطیر مورتوضو سوروشسان گؤرسه درلر !
- عزت آغا ! باخ گؤر بو کارتلار دا " توحید " خیاوانینا گئده جک ؟
- بلی . داییم گیل توحید خیاوانیندا اوتورارلار ، دؤرد ایلدیر کی گل - گئدیمیز یوخدور ، اونا گؤره کوچه نین آدی ایله پلاکلارین اونوتموشام آما باخسان آدرسده یازمیشام کی سول الدن ایکینجی کوچه ده آغ قاپی !!!
- آغ قاپی ؟ بلکه بو دؤرد ایلده قاپیلارین آیری رنگله رنگله ییبلر ! بیلمیرسن کوچه نین ایچینده نئچه نجی قاپیدیر ؟
- دوز دئییرسن هاااا . کارتین اوستونده یاز "سول الدن بئشینجی قاپی " ! 25 نفرین کارتیدیر ، گئدیب تاپانمازسان پیس اولار !
- یازدیم ! قیز طرفینین کارتلاری هانی ؟
- قیز طرفی " کوی بهشتی " ده اوتورارلار ، آدرسینده یازمیشام کارتلارین بیرینین اوستونه ! بو کارتلار دا گئده جک " گلپارک " دا بو یازدیغیم آدرسه ، بونلاری دا آپاراجاقسان " امام حسین " مئیدانیندا بو آدرسه ، بونلار دا کی " آذربایجان " بولواریندا یازدیغیم بو آدرسینکیدیر ، بونلار دا " اوستاد شهریار " بولواری . آدرسی ده اوستونده دقیق یازیلیب !
- دئییرم غزت آغا ! یاخشی ایش گؤروبسن ها ف یوخسا کارتلاری بیر به بیر هره نین کین اؤز قاپیسینا آپارسایدیق بیر آی چکردی !
کارتلاری عزت آغادان تحویل آلیب بیله سین یولا سالدیم ! ایندی بیر من ایدیم بیر ده بیر تلیس کارت ! گئجه یاریدان سوووشموشدو ، گؤردوم اوغلومون اوتاغینین چیراغی یانیر ، بیله سین چاغیردیم : آتابی ! آتابی ! »
- بلی آتا !
- نه ایش گؤرورسن اوغول ؟
- شنبه امتحانیم وار . درسه باخیرام !
- وای دده ! درسی نئیلیرسن اوغول ؟ اوخودون اولاجاقسان من داااااااا ! بیر دقیقه بورا گله بیلرسن ؟
آتابی اوتاغیندان چیخیب منیم یانیما گلدی . من ده آدرسلری بیله سینه توضیح وئرندن سونرا یالوار - یاخار ایله تبریزین نقشه سی ایله توی کارتلاری بیله سینه وئریب کارتلارین پایلاماغین اونون باشینا سالدیم ! آتابی کارتلارین آدرسین نقشه اوزویله چک ائدرک من ده اونون الیندن اکیلیب باشیمی آتیب یاتدیم کی سحر یوخویا قالمایام ! سحر چاغی آتابی مندن قاباق آییلیب کارتلاری گؤتوروب ائودن چیخمیشدی ! ایداری ایشلریمی یئر به یئر ائدندن سونرا ائوه قاییدیب اوز - گؤزومه صفا وئردیم ! قاش قارالمامیش عزت آغا گیلده اولمالی ایدیق .
آتابی هله قاییتمامیشدی ، خانیمین الیندن یاپیشیب عزت آغاگیله گئتدیک ، آغالارین مجلیسی اوست قاتدا ایدی ، ایچری گئدیب عزت آغاگیلین ایلک قوناغی اولدوق ، " کئفسیز مجید " ین ارکست قوروپو دا بیزدن بیر آز سونرا گلیب سازلارین کؤکلمه یه باشلادیلار ، شام واختی اولموشدو آما قوناقلاردان خبر یوخ ایدی ، عزت آغا ایله منیم گؤزوم قاپیدا قالمیشدی ! عزت آغانین صبری داشیب قولاغیما پیچیلداییب : دار گونده قوهوم - قونشو دا آدامی اونودارمیش ! الیم آشاغی اولدوغونا گؤره کیمسه قاپیمیزی آچمادی ! » دئیرکن آغلادی ! منیم ده گؤزلریم دولموشدو ، اولسون عزت آغا ! آللاه آدامی اونوتماسین ! من اؤلمه میشم کی . ایندی گئدیب اؤز قونشولاریمیزی تویا چاغیرارام ، ائله چالیب اوینایاجاغیق کی دردین یادیندان چیخسین کیشی ! »
قونشولاری چاغیرماق 10 دقیقه چکمه دی ، آتابی ده کارتلاری پایلاماقدان قورتولوب ایچری گلدی ، شامی یئییب جانا سینر توی توتدوق ! عزت آغانین خرجی باتسا دا ، خاطیره لی توی اولدو . گئجه یاریدان سوووشوب ائوه قاییداراق عزت آغا بیزی یولا سالاندا دئدی : یورولمایاسان عزیز قونشو ! دده بالا منیم بوینوما قارداشلیق حقی قویدونوز ! سیز گئدین استراحتینیزه یئتیشین من ده گؤروم نه داشی سالمالیام باشیما بو ایستکلی قوهوملاریم ایله ؟ بئله اولماز ، سحر چاغی هامیسینا زنگ ووروب گیلئیلیک ائده جه یم ! » عزت آغایا دیلدارلیق وئرندن سونرا ائوه گلیب یورقون دوشوب یاتدیق !
گؤزومو یوخو توتوب توتمامیش قاپینین سسینه یئریمدن دیک آتیلدیم ! سحر اولموشدو آما ائله یورقون ایدیم سانکی بیر ده یقه دیر یوخلامیشام ؛ من هن - هون ائدیب قاپیا چیخینجا ، زنگ بیر داها چالیندی ، گؤردوم آتابی هله یئتدی یوخونون ایچینده دیر ، زیققینا - زیققینا اؤزوم قاپینی آچماق زوروندا قالدیم ! قاپینی آچجاق یاخام دوشدو عزت آغانین الینه ، هویوخموشدوم !
- سلام عزت آغا ! نه اولوب کیشی ؟ منیم یاخامی نیه چکیب جیریرسان ؟ من سنه نئیله میشم ؟
- منیمله نه دوشمانچیلیغین وار ایدی ؟ . هن ؟ سنه نئیله میشدیم یئکه کیشی ؟ هئچ اوتانمیرسان ؟ بو نه قونشولوغو ، نه یولداشچیلیغیدیر ؟
- دئمیرسن کی نه اولوب ؟
- هئچ زاد ، ایستیردینم نه اولسون ؟ گئجه نی سحره کیمی فیدن یاتانمامیشام ، سحردن ده قوهوم - قونشویا زنگ ووروب ایسته میشم باسام یامانا ، گیلئیلیک ائدم کی اونلار منی قاباقلاییب دئییبلر : سن بیزه کارت گؤندرمه دین کی بیز ده گلک تویا ! » اولمایا اونلاری آتیبسان زیبیل قابینا !
- یوخ بابا ! قوی اوغلومو چاغیریم گؤروم !
بیزیم سسیمیزه آتابی گؤزلرین اووارکن قاپیا چیخدی ، جریانی بیله سینه تعریفله ییب دئدیم : اوغول! گئت نقشه نی گتیرگؤستر عمی جانا ، عمی جان گؤرسون کی نئجه دقیق نقشه اوزو ایله آدرسلری نیشانلاییب کارتلاری پایلاییبسان ! » آتابی گئدیب نقشه نی گتیریب عزت آغایا گؤستریب دئدی : من آدرسلری نقشه اوزویله پایلامیشام آما کارتی هانکی قاپیا آپاریردیم قبول ائله میردی ، زور ایله کارتلاری بیله لرینه وئریردیم ، بو نقشه بو دا سیز ، باخ گؤر من هاردا یاهالمیشام ؟ » عزت آغا نقشه یه باخیب آتابه یین قوپالاغین گؤتوردو ! یاخشی هله آتابه یین سرعتی چوخ ایدی یوخسا عزت آغانین الینه دوشسه یدی یازیق اولاردی ! عزت آغا سویو سوزولموش یانیما قاییتدی .
- باخ بیر . سنین اوغول بالان " لاله " ده کی امام حسین میدانینداکی قوهوملاریمین کارتین وئریب " ارم " ده کی امام حسین میدانیندا نم کیمه ، قاسیم داییم گیلین کارتلارین " قارا آغاج " داکی توحید خیاوانی یئرینه " طالقانی " ده کی توحید خیاوانیندا ایتیر باتیر ائدیب ، " زعفرانیه " ده کی کوی فرهنگیانین کارتلارین آپاریب وئریب " شام قازان " داکی کوی فرهنگیاندا نم هارا .
- من اؤلوم ؟
- یامان هوشلو - باشلی دده - بالاسیز واللا ! گئدیب شهرداری استخدام اولمالیسیز بااااااا سیز ، سیز اولماساز 20 ده تبریزه گلن توریستلر دووار دیبینده قالار .
- آخی بیز ده ده ائله گوناه یوخدور کی ، سن گئدیب تبریزین شهرداریندان شکایت ائده جکسن بااااااااا ، بیر یاندان تبریزین قدیمی آدلارین ده ییشیر ، بیر یاندان دا بیر آدی تبریزین نئچه منطقه سینه سئچیر !
منیم سؤزلریم عزت آغانی یوموشالتماق یئرینه ، بیله سین دلی ائتدی ، الینه گله نی آلیب باشینا چیرپیردی یئره ! گؤردوم آتابی ایله منه ده مشتری گؤزو ایله باخیر ، تئز آتابه یین قولوندان یاپیشیب آرادان جیردیق یوخسا ایکیمیزی ده آلیب باشینا یئره چیرپسایدی ، ایکیمیزینده قویوغوموز پارتلاردی !
آز تاپاریق آز یئیه ریک ، چوخ تاپاریق چوخ !
، ,بیر ,عزت ,؟ ,کی ,دا ,عزت آغا ,عزت آغانین ,ده کی ,بیر تلیس ,بیله سینه
درباره این سایت