- پیس اوشاق ؟ ! یئنه ده نه اولوب سنه ؟ نه دئیینه - دئیینه گلیرسن ؟
- هئک جاد عجیجیم . هئک جاد . !
- آوا . آوا . ! بو جور ازیله - ازیله دانیشسان آخیرده شیتیلین چیخارهااا ! اؤزو ده کی همیشه اؤزون بیر بئله یوبانیرسان اؤزون ده مسئوللارین باشی سویوقلوغونا لاغ ائدیرسن ! بیر ساعات قاباق زنگ وورموشام کی شام حاضیردیر ، دئییبسن " سوفرانی آچ بئش دقیقه یه ائوده یم ! " سنین بو بئش دقیقه ن بیر ساعات اولدو ، به هاردا قالدین ؟ اوغلون دا سندن بئش بتر ! سونرا دا مستوللاردان گیلئیلیسن کی فیلان پروژه نی بیر ایل دئییب ، ییرمی ایله قورتارا بیلمه ییبلر !
- سکینه دایغیزی ! آز دانلا منی سن آللاه ! غاباقیما ایش کیخدی کی یوباندیم !
- دیلینی اییب منی دارخدیرما ! گکیل سوفرانین باشینا . چکیل . چکیل . ! دویونو اؤزون چسن یا من چکیم ؟
- ععععععع غاشغ بوشغابی وئرسن اؤجوم ککرم !
- دده وای ننه وای ! کیشی اولمایا بئینین فورمت اولوب قاییدیب کرخانا تنظیماتینا ؟ حرفلری نیه کؤرپه لر کیمی ده ییشیک دئییرسن ؟
- لهگه درمانی ائدیرم سکینه دایغیزی!
او نمنه دیر ؟
- تاجا بخشنامه قلیب کی لهگه سی اولان معللیملره درس دئمک ایگاجه سی وئریلمه یه گک ! بیر آج فیله شیب قؤردوم ایخراگ اولانلارین ایکینده یم ، ایندیدن تمرین ائدیرم کی لهگه تستیندن غبول اولام ! قؤر حغغیم وار مسئوللاری لاقا غویام یا یوخ ؟
- دوغرودان ؟ یازیق معللیملر ! . آما سنین بئله داتیشماغینین لهجه یه نه ربطی وار ؟ سن سؤزلری ترسه - تورسه دئییرسن باااا ! ائله دانیشیرسان کی ائله اؤزون باش تاپایرسان نه دئییرسن ! " غ " اولوب " ق " ، " ق " اولوب " غ " .
- لهگه ایله دانیشماماقین ایلک یولو بعجی حرفلری قلط - قولط دئمکدیر ! " ق " اولاگاغ " غ " ، " غ " دا غاییدیب اولاگاغ " ق " ! " چ " اولاگاغ " ک " ، " ز " دا اولاگاغ " ج " ، " ج " دا مایاللاغ ووروب اولاگاغ " گ " ، سونرا " گ " دؤنوب اولاگاغ " ق " !
- نه ده مسخره ! بو اولان ایش دئییل ، حتمن شوخلوق ائدیرسن یوخسا بیزیم مسئوللار موفته سؤز دانیشمازلار ! اگر لهجه سی اولان معللیملری استخدام ائتمسه لر حتمن لهجه لیلری عسگر ده آپارمایاجاقلار ، مالیات دا آلمایاجاقلار لهجه لیلردن ! هن ؟
- هن غیز ! ائشیتمیشم آرابالارین دا گریمه ائتمیه گکلر خخخخخخخخخخخخ
سکینه دایقیزی ایله آپاردیغیمیز علمی ( !!! ) بحث تازا شیرینله شیردی کی قاپی آچیلدی . " آتابی " همیشه کینه تای ساللانا - ساللانا ایچری گلیب سلام ! » وئردی . کیشی نین اوغلونون قاش قاباغی یئر ایله گئدیردی ! هر ایشی هر اخلاغی ننه طرفینه چکسه یدی ده ، کیشی کیمی قاش قاباقلی اولماغی دوز اؤزومه چکمیشدی ! روحیه دن ده دوشدوک آتانین الیندن ! » دئییب یانیمدا اوتوردو ! بیزیم ائوده بو ننه بالانین عادتی ایدی کی ترامپین دا بارالارین سالسینلار منیم باشیما ! آغا سحر گونش چیخمامیشدان ائودن چیخیب ، هئچ آتاسینین اوزون ده گؤرمه ییب ، ایندی ده کی گونش باتاندان سونرا ائوه گلیب ، روحیه سیزدیر . اؤزو ده منیم الیمدن !
- اوقول ! من سنین تویوقونا پیشته دئمیشم یا پیشییینه کیشته . ؟
- آتا ! تویوغا کیشته دئیرلر ، پیشییه پیشته ! حوصله ن اولمایاندا یاهالیرسان هااااااااا
- گیبینی پولسوج غویموشام ؟
- یووووو
- قیج دوستوندان دورموشم ؟
- یووو آما نیه بئله دانیشیرسان آخی آتا ؟
سؤز قیز دوستونا چکیلجک خانیم اعتراض ائدیب دئدی : یاخشی بابا ! اوشاغین اوزون آچما ! » خانیما " باش اوسته ! " دئییب ، اوغول بالانین منیم الیمدن روحیه دن دوشمه سینین علتین سوروشدوم !
- بو نه ایشیدیر اؤزونه تاپیبسان ؟ معللیمچیلیک ده اولدو ایش ؟ ایندی بو لهجه ن ایله نئیلیه جکسن ؟
- نیقران اولما . هر جاد دوجه لر . هئک جاد اولماج ! قؤرمورسن تمرین ائدیرم ؟
- آهاااااااان ! دئییرم آخی نم نجور دانیشیرسان ! بیر آز دا غلیظلتسن داها دیلیندن باش چیخاردانمارام ! " ز " اولوب " ج " ، " ج " اولوب " گ " .
- بلی دا . ایستیرم اوخوللار آکیلینگا لهگه می دوجلدم !
- آتااااا ! لهجه ن دوزلمه دی نئیلیه جکسن ؟ اولمازدی او زامان معللیم اولماییب کرخانا صاحیبی اولاسان ؟
سکینه دایقیزی بیزیم بحثین آراسینا شتل آتسایدی دا ، بیزی سوفرا باشینا چکنمیردی ، حیرصله نیب دئدی : دای بسدیر دااااااااا . گلین سوفرا باشینا ! گؤر نه ده انگلری صحبته قیزیشیب ! » سوفرانین باشینا چکیله - چکیله دئدیم : لهگه م اولدوقونا خاطیر کرخانا صاحیبی ده اولانماجدیم ! آنگاغ قرک هر ایشه باخسایدیم لهگه می دوجلده یدیم ! »
- آتا ! نه ربطی وار ؟
- ربطی وار بالا . ربطی وار ! ربطی وار کی لهگه سی اولان کرخانادارین مالیاتی یوجده اون آلتی آما لهگه سی اولمایان اصفهانلیلارین ، تهرانلیلارین مالیاتی یوجده ایکیدیردااااااااااااا اوقول !
اصلن کرخانا ایستمه دیک با . جهنم . نیه فوتبالیست اولمادین ؟ سنکی یاخشی توپ اویناردین . اونا کی لهجه نین ربطی یوخدور !
- ربطی وار بالا . وار ! آقجیندا دئییرسن " تراختور " ! او " خ " ایشلری کورلور باااا ! لهگه نین ربطی اولماسایدی تراختورون حغغی بیر بئله یئییلمجدی !
- یاخشی . آل وئچی اولسایدین ، نئجه ؟ بازار کی لهجه میزه گؤره تنظیم اولماییب !
- بیز کی تومانا تومن دئییریک ، ایشلر کورلانیر !
- ععععع دوز ئییرسن ها آتا ! تومانا نه دئییریک به ؟
- تومانا دا شالوار دئییریک ! بیز باشدان آیاقا لهگه ییک با . قرک تمرین ائدک !
- آتا ! سنی بیلمیرم ، منکی افتخار ائدیرم لهجه م وار ! روحیه م ده گلدی یئرینه با ! سن ده چوخ فیکر ائله مه . اؤزون دئمیشکن " هر زاد دوزه لر ! بو جور ده دانیشیب هامینی داریخدیرما .
سکینه دایقیزینین بوز - بوز باخماغیندان ، شامین نقدر سویوماسی بللی ایدی ، بیله سینه باخیب گولومسیه رک دئدیم : آما قورخورام لهجه مین اولدوغونا گؤره بو ایلدن درس وئرنمه ییب ایشیمی الدن وئرم . ! »
- کیشی ! آز تاپاریق آز یئیه ریک ، چوخ تاپاریق چوخ ! آللاه قادیردیر ! ال ساخلایین شامی بیر داها قیزدیریم سونرا . منیم کی جانیما سینمز سیزه سویوق یئمک یئدیردم !
آما دوزون آختارسانیز من سوبایلیق دا اونلارین ائوینه قوناق گئدنده منه ائله "بی بی اوغلو" دئیردی کی ائشیتجک ، آز قالاردی قلبیم دایانسین ! دئمه زور ایله ده اولموش اولسایدی ، ایستیرمیش منیم اوره ییمده یئر سالا ! آما ائولنندن سونرا "بیبی اوغلو" اونوتولدو ! یاواش _ یاواش منی سسله ینده کیچیک آدیم ایله سسلیردی : آغا ابیلفضضضضضضضضضض ! » اؤزو ده بو "ض" حرفین ائله اوزادیردی کی لاپ بئینیم جیزیلیردی ! یاواش _ یاواش "ض" حرفیندن فاکتور آلیب ، منی آغا ابیلفضضض _آغا ابیلفضض _ آ ابیلفض _ آ فض _ ابیلی _ ابی سسله دی ! ایندی داها هامیسیندان فاکتور آلیب بیر دفعه لیک " ا ا " سسلیر !
سؤز واختینا چکر ، نم نئچه ایل قاباق ائله بو زامانلاردایدی کی سکینه دایقیزی بؤیوکلرین ایجازه سی ایله "بععععععلی" دئمیشدی ! بو "بععلی"دن بیر _ ایکی هفته کئچندن سونرا ، هاوا سویوق ، منه ده سویوق ده ییب زوکام اولموشام ، قایناناگیلده ده قوناغام ! قاینانا دا آخی ایستکلی اولار ، یون یورغانی چکیب اوستومه ، هئی یارپیزدان دمله ییب منه ایچیردیر کی بو سویوق ده یمه کوره کنی نین جانیندان چیخسین ! آما سویوق منیم سوموکلریمه کیمی یئریمیشدی ، جانیمین زوققولتو سسین قونشولار دا ائشیدیردی ! من بو حالدا اؤلوم ایله ال به یاخایام ، سکینه دایقیزیم دا ایکی آیاغین بیر قوندارا باشماغا گئیمیشدی کی بیرلیکده دولانماغا چیخاق ! چوخ یالوار _ یاخار ائدندن سونرا منی اسپورتی گئییندیریب قیشین شاختاسیندا دولانماغا چیخدیق ! یئر بوزلوق ، منیم ده باشماقلاریمین آلتی کئچلین باشیندان ، کاسیبین اوره ییندن صافدیر ، یئرده _ گؤیده دورمور ! من ده خانیم گیلین محله لرین تانیمیرام کی هارا هارادیر ! بیر آز یول یئری یندن سونرا بیر اوزو یوخاری ، ائنلی کوچه یه چاتدیق ! باشماقلاریم زویه _ زویه کوچه نی اوزو یوخاری چیخیریق !
هههههههههه ! دئمه سکینه دایقیزیمین مدرسه سی بو کوچه ده ایمیش ، خانیم ایستیرمیش منی همکیلاسلارینا نیشان وئریب پوز وئره ! دوز مدرسه لر داغیلان زامان بیز کوچه ده یدیک ! ایندی خانیمین همکیلاسلاری ، قونشولارینین قیزلاری ، مدرسه دن چیخیب ، ائولرینه ساری گئدیرلر من ده ایفاده ایله آتدیم آتیرام کی اونلارین یانیندا زویوب ییخیلمایام. قیزلار بیزیم قاباغیمیزدان سوووشدوقجا بیری دئییر:سکینه ! آللاه خوشبخت ائله سین !» بیری دئییر:قوشا قارییاسیز !» بیری دئییر:ساغ الین بیزیم باشیمیزا !!!!!!!!» بیری .
داها هامیسی یادیمدا دئییل آما چوخ سؤز دئدیلر ! خانیم دا هره سینه بیر جور جواب وئریر . منیم بو زوکاملیغیم بس دئییل ، اوتاندیغیمدان آلنیمین تری آخیب ، آغیز _ بورنومون سویونا قاتیشیب ! آنجاق یاواش _ یاواش منیم بو حالیمدا ، هاوانین بو سویوغوندا ، اؤزو ده بو ساعاتدا بو کوچه یه نیه گلدیییمیزی آنلادیم ! آرتیق سیملریم قاتیشمیشدی ! کوچه نین اوزو یوخاریلیغین مین بیر مصیبت ایله باشا چاتدیردیق ! یامان اوتانمیشدیم ؛ خانیمین بو ایشیندن انتقام آلمالی ایدیم ! اؤز _ اؤزومه فیلشیب میرتا سالیب الیمی سکینه دایقیزیمین الیندن اؤتوردوم . سکینه دایقیزیمین مات باخیشلاری اؤنونده ، بیر _ ایکی آتدیم قاچیب ، بیردن یئره اوتوروب ، بوزلو کوچه نی اوزو آشاغی زویمه یه باشلادیم ، به.بو.به.بو.» دئیرکن کوچه نی ایسکی گئدیردیم ! بیر آن اؤنجه سکینه یه تبریک دئین قیزلار ، به.بو.» سسینه هویوخوب ، منی او حالدا کوچه ده زویولدک گئتمه ییمی گؤردوکلرینه آغیزلاری آچیق قالمیشدی ! بیری دئییردی :سکینه نین ده نیشانلیسی دلی چیخدی !» بیری دئییردی:یازیق قیز ! آللاه کؤمه یی اولسون!»بیری دئییردی :به بو اوغلان بئش ده یقه قاباق سالیم ایدی آخی ! بیردن بونا نه اولدو؟» بیری دئییردی:یازیق ! اؤزو ده جاواندیر ! آللاه ایکی شفانین بیرین وئرسین !» سرعتیمین چوخ اولدوغونا گؤره چوخ سؤزلری ده هله ائشیده بیلمه دیم آما سکینه دایقیزیمدان یاخشی انتقام آلدیم !
کوچه نین آشاغیسینا یئتیشندن سونرا ترمز توتوب دایاندیم ، باشیمی چئویریب کوچه نین باشینداکی نیشانلیما باخیب گؤردوم کی سکینه دایقیزی مجسمه کیمی دایانیب منه باخیر ! فیکر ائدیرم من کوچه نی زویولده ییب آشاغی یئندیکجه ، اونون دا فیشاری یئنیرمیش !!!!!!!!!! ایندی هردن او کوچه دن سوووشاندا ، سکینه دایقیزیمین مجسمه خاطیره سی یادیما دوشوب او کوچه نین باشیندا،اونون مجسمه سین قوردورماق بئینیمه وورار !
ایندینین ایندیسی ده ، قیش گونلرینده خانیم ایله بیرلیکده اوزو آشاغی کوچه _ خیاوانا چیخساق ، یازیق ائله برک _ برک قولومدان یاپیشارکی ! دئسم ده : قولومو بوراخ بیزیم قول _ قولا گئتمک چاغیمیز دئییل ! » دئیر : قورخورام یئنه ده الیمدن قاچیب ، زویولدک گئدیب من اوتاندیراسان !»
- سلاااااام آآآآآآآآ ممی ! کئف احوال ؟ نه خبرلر ؟
- سلام ! دوغرودان پیس اوشاقسان هااااا ! ملاقاتیما گلمه دین باری زنگ ووروب حالیمی سوروشایدین .
- گؤرورسن دا باشیم چوخ قاریشیق اولور ، شرمنده ! هله نئجه سن ؟
- گئچینیرم داااااا
- من اؤلوم ؟ واللاه سن چوخ بتر آدامسان ، بو زمانه ده گئچینمک هر آدامین ایشی دئییل ! کیشی به سن هله بیر هفته استراحتدن سونرا یئنه ده یان پرتی ایشلیرسن آخی !
- هن بابا . من ده آغیر آداام . بئل ده کی دوزلمک بیلمیر !
- هله نه ایش گؤروردون کی بئلین سرپدی ؟
- هئچ زاد بابا ! اوچ دؤرد عاییله ییغیشیب بیر معمولی قوچ آلدیق ، قرار اولدو همیشه کی کیمی اونون باشین من کسیب اتین بؤلوشک آما هر یئری آختاردیم پیچاغی تاپانمادیم ! اسماعیلا دئدیم : اوغول ! چیخ داما گؤر پیچاغی داما آپاران اولماییب ؟ » اسماعیل داما باخیب پیچاغی تاپدی ، من ده قوچو بئلیمه آلیب داما چیخارتماق ایسته دیم آما بئلیم سرپیب نردوواندان یئره ییخیلدیم .
- لاپ دا یاخشی اولوب ، ائله حقین ایمیش !
- نیه پیس اوشاق ؟
- کیشی به سنین عاغلین آزمیشدی ؟ به قوچو داما چیخاردینجا ، دامدان پیچاغی گتیریب قوچو دا یئرده کسه یدین دا !
- دوز دئییرسن هااااااا . بونو ییخیلمامیشدان قاباق دئیه جه یدین باااا !
- اووجومو اییله مه میشدیم کی آ ممی ! دؤکتوره ده گئتدین یا یوخ ؟
- گئتدیم آنا چوخا باخدی بیله مه ، دؤکتورلرین چوخو بیمه ایله باخمیرلار کی ، یالنیز داوالاری دفترچه یه یازیرلارکی داوالارین دا چوخونا بیمه شامل اولمور آما بو بیر هفته استراحتیمین خرجین بیمه وئره جک !
آ ممی دوز دئییردی ، آدی بیمه اولوروق پولون دا اؤزوموز تؤکوروک ، هانسی ایش صاحیبی ایندی ایشله ینلرینین بیمه سین اؤزو تؤکور ؟ بیر زامان ایشله ینلری آنباردا گیزله دردیلر کی بیمه مامورو گؤرمه سین ایندی ده دئییرلر کی : بیمه پولون اؤزوز تؤکسز بیمه ائدیرم ! » آ ممی دئدییی کیمی ده دؤکتورلرین چوخو یالنیز داوالاری دفترچه یه یازماغی بیلیرلر !
من آ ممی ایله دانیشدیقجا " آ مخصود " دا هردن سؤزلریمیزه قاتیشیب ، هردن ده اؤز - اؤزونه گولوردو ! آ ممی دن آیریلاندان سونرا آ مخصودو چاغیریب سوروشدوم : هن ؟ نه اولوب ؟ کئفین سازدیر هااااا ! بیزیم سؤزلرین هاراسی گولمه لی ایدی کی سنین ایچین گئچیردی ؟ »
- بیر سؤز دئیه جه یم سنه ، یوخ دئمه هااا
- نه سؤزو آ مخصود ؟
- آ ممی شرکتده هامینین آناسینین آدین اؤیره نیب هامینی دا اؤز آدی ایله یوخ آناسینین آدی ایله سسلر ، ایندی لاپ یئریدیر کی اونون آناسینین آدین اؤیره نیب بیزه لوطف ائله یه سن ! بیز اونون آناسینین آدین بیلمیریک آخی !
- په هوووو ! دئییرم ها هر سحر ایشه گلنده ، سنه " سلام نرگیز خانیمین اوغلو ! " دئیر ، رحیم آغایا دئیر : " یورولما فاطما سورانین اوغلو ! " خخخخخخ دوز دئییرسن . اوشاقلاری آناسینین آدی ایله سسلر !
- بلی . هم قلبی قارادیر هم ده ایسته میر اوشاقلار دا اونو آناسینین آدی ایله سسلیه لر ، بیزلر ده کی اونون آناسینین آدین بیلمیریک ، بیزه پوز وئریر !
- ایندی من نجور اونون آناسینین آدین اؤیره نیب سیزه دئییم ؟
- چوخ راحت ! بیر - ایکی گون سونرا بیله سیندن سیجیللی فتوکپی سی ایسته ییب دئیه جکسن کی بیمه دن زنگ ووروب ایستیرلر پرونده یه ووروب استراحتلرینین پولون وئرسینلر ! » فتوکپی دن آناسینین آدین اوخویوب بیزه دئیه جکسن !
- آهاااااااااان ! ولی خرجی وار هاااااااا ! خخخخخخخخ
- بیر گون ناهارا منه قوناق ! او بیری اوشاقلاردان دا گؤروم نمنه بویون اولورلار ، صبحانه دن ، کؤینکلیکدن زاددان ، گؤروم نمنه قوپاردا بیلرم دا !
نئچه گوندن سونرا آ مخصود دئین کیمی ، آ ممی نین یانینا گئدیب بیله سیندن فتوکپی ایسته دیم !
- منیم فتوکپی می نئیلیرسن پیس اوشاق ؟ خیر اولا .
- بیمه دن زنگ ووروب ایسته ییبلر ، گومان ایستیرلر پروندن یه ووروب سونرا استراحت پوللارینی تؤکه لر !
آ ممی قبول ائدیب صاباحیسی گون منی چاغیریب فتوکپی نی دؤرد قات قاتلاییب بیله مه وئردی ، من ده آلیب دفتره ساری گئتدیم آما فتوکپی یا باخیب گؤردوم آناسینین آدینین اوستون ائله قارالاییب کی اوخونماسین ! فیکر ائتدیییمیزدن داها چوخ قلبی قارا ایمیش ! جریانی اوشاقلارا دئییب اونلاردان ایسته دیم سسلرین چیخارتماسینلار ! من ده اوزومه گتیرمه ییب دؤزدوم . صاباحیسی گون ناراحات قیافه ایله آ ممی نین یانینا گئتدیب دئدیم : آغا ! دونن وئردییین فتوکپی نین مخدوش اولدوغونا گؤره بیمه دن زنگ ووروب بیر آیریسین ایسته ییبلر ! » آ ممی اؤنجه بیر آز هویوخدو آما قبول ائتدی کی صاباح دوز عمللی سین چیخاردیب گتیرسین ! صاباحیسی گون اؤزو منی چاغیریب فتوکپی سین بیله مه وئردی ! من ده بیر آز فاصله آچاندان سونرا هیجان ایله فتوکپی یا باخیب گؤردوم بو دفعه ده آناسینین آدینین اوستونه بالاجا کاغاذ قویوب سونرا فتوکپی چیخاردیب کی آناسینین آدی بیلینمه سین ! بو دفعه اوشاقلاری جریاندا قویوب بیله لرینه تاپشیردیم کی آ ممی نین یانیندا بارا وئرن اولماسین ! صاباحیسی گون حیرصلی قاش قاباقلی ایکن آ ممی نین یانینا گئدیب دئدیم : آغاااااا ! بیزی سریییبسن یوخسا اؤزونو ؟ »
- نه اولوب پیس اوشاق ؟
- یئنه ده بیمه دن زنگ ووروب دئییبلر کی گؤندردییینیز فتوکپی درده ده ین دئییل !
- نیه ؟
- نیه سین اؤزون مندن یاخشی بیلیرسن ! بیمه دن دئییبلر : " صاباح سیجیللینین اصلین بیمه یه گتیرین یوخسا بو متقلب آدامین بیمه سابقه سی کؤدن سیلینه جک ! " بیلمیرم نه ایش گؤروبسن کی بیمه نین گؤزونه آلا - بولا گلیرسن !
- آغای پیس اوشاق خاان ! اولماز من بو استراحتیمین پولون بیمه دن ایستمه یم بلکی یاخامدان ال چکه لر !
- استراحت خرجینه ربطی یوخدور با ، شک ائدیبلر پرونده ن ایله مدارکینه !
صاباحیسی گون آ ممی منی گؤرجک سیجیللیسین چانتادان چیخاردیب منه وئردی : پیس اوشاق ! شولوزونمه سن بو سیجیللینی بیرینه گؤستره سن ! خئچ سن اؤزون ده آپیب باخما ! ائله بئله سی بیمه اداره سینه گؤندر ! » سیجیللینی بیله سیندن آلیب بیر ایکی آتدیم فاصله آچاندان سونرا ایلک صحبفه سین آچدیم ! حیرص آ ممی نین باغارسیغین کسیردی آما من آختاردیغیمی تاپمیشدیم ! سیجیللینی بوکوب آ ممی نین اؤزونه قایتاردیب دئدیم : من آختاردیغیمی تاپمیشام کیشی ! نه استراحت خرجی نه بیمه سی نه سیجیللیسی ؟ منه اؤنملی اولان سنین آنانین آدی ایدی ! بو نه پیس عادتدیر ؟ اعلامیه لرده آنالارین آدین یازماغا قلبی قارالیق . جمع ایچینده خانیملارین آدین آپارماغا قلبی قارالیق . خانیما ، بیزیم اوشاقلار دئمک . اوغلان ! ال چکین بو ایشلردن ! بیری سنین آنانین آدین بیلسه نه اولار مثلن ؟ آددیر دا ، بو دونیادا کیم آدسیز قالیب ؟ هره نین بیر آدی وار دا ! » سونرا اوزومو اوشاقلارا توتوب اوجادان دئدیم : اوشاقلار انتظار سونا چاتدی ! داها صاباحدان بو کیشینی آ ممی سسله مه یین ! بو کیشی جیران خانیمین اوغلودور ! جیران ایله جیران خانیمین اوغلونون ساغلیغینا جانا سینر چپیک چالین ! »
گونلرین بیر گونونده ، تبریزین یای فئستیواللارینین بیرین ده ، منه زنگ آچیب ، فئستیوالدا وئرلیشینین اولدوغون خاطیرلادیب منی ده بو فئستیوالا چاغیردی ! من ده کی موفته یئردن قاچماماق عادتیمدیر ، قبول ائتدیم !
_ پیس اوشاق ! نئچه نفرسینیز؟
من ده بوتون طایفانی وجهه قویوب ییرمی بئش نفریک!» دئدیم. چوخ اولدوغوموزا گؤره دئدییینه پئشمان اولموش کیمی دویولوردو ، فیلان گون آخشام اوستو فیلان سینمانین قاباغیندا گؤزلورم ، حتمن گلرسینیز !» دئدی !
باش اوسته دئمکدن سونرا باشقا چارام یوخ ایدی . فئستیوال گونو یئتیشیب ، بوتون قوهوم _ قونشونو بیر یئره ییغیب ، شعبده باز دوستوم دئین سینمانین قاباغینا گئتدیک ! بیر آزدان دوستومو اوردا گؤروب 25 فقره موفته بیلیطی آلیب ، بیله سیندن تشککور ائدیب آیریلاندا ، دوستوم دئدی :پیس اوشاق قارداش ! سندن بیر بالاجا ایسته ییم وار ، الیندن گلسه اونو مندن اسیرگه مه یه سن !»
_ بونلار نه سؤزدور کیشی ؟ سن امر ائله ، من خیدمتینده یم !
_ تراختور نئچه ایلدن سونرا بو ایل برتر لیگه گلیب ، اونا گؤره بوتون توپلانتیلاردا/مجلیسلرده تراختورون سؤزو وار ! دوزون آختارسان منیم بیر امکداشیم وار کی بو گئجه نین وئرلیشینده منیمله اولا بیلمه یه جک ؛ منیم ده تراختورا گؤره بیر شعبده بارلیغیم وار کی اونو ایکی نفره اجرا ائتمک اولار ، افتخار وئریب منه یاردیم ائتسن ، من ده بو شعبده بازلیغی بوردا اجرا ائدرم !
_ الیمدن گلسه ، عیبی یوخ !
شعبده باز دوستوم ، جیبیندن بیربارماق یئکه لیکده سلیقه ایله بوکولموش ، قیرمیزی پارچا وئریب منه دئدی : باخ بیر ! بو فئستیوالدا کیمسه بیزیم تانیش اولدوغوموزدان خبری یوخدور ! سنه وئردیییم بو بوکولو پارچانین بیر مئتیر ائنی ، ایکی مئتیر بویو وارکی اوستونده "یاشاسین تراختور" یازدیرمیشام ؛آما بو پارچانین جینسی اؤزل/مخصوص اولدوغو ایچین ، بوکولندن سونرا بیر بارماق یئکه لیکده اولور ! بو پارچانین ائله بوکولوسون کؤینه یینین جیبینه قویاجاقسان ، منیم وئرلیش نوبتیم اولاندان سونرا ، بیر _ ایکی شعبده بازلیق ائدیب سونرا ، تراختورون بؤیوک بیر بایراغین کی اونون دا اوستونده "یاشاسین تراختور" یازدیرمیشام ، اججی _ مججی ائدیب یوخ ائده جه یم ! اوندان سونرا تاماشاچیلارا دئیه جه یم :هر کیم ایستیر بو پارچانی اونون جیبیندن چیخاردام ، الین قووزاسین !» بللیدیر کی هامی الین قووزایاجاق ، سن ده اونلارا قوشولوب الینی قالدیراجاقسان ، من ده تاماشاچیلارین ایچیندن سنی سئچیب ، صحنه یه چاغیراجاغام ! یالنیز قاباق سیرادا اوتورماکی شک ائله ین اولماسین ! بیر ده اوتوردوغون یئری منه آنلات کی گلیب تاماشاچیلارین ایچیندن سنی راحات تاپا بیلیم ! سن ده اؤزونو بیلمه مزلییه ووروب صحنه یه چیخاجاقسان ! صحنه یه چیخاندان سونرا ، یوخ ائتدیییم پارچانین یئرینه سن ده کی پارچانی ، کؤینه یینین جیبیندن چیخاردیب ، تاماشاچیلارا گؤستره جه یم !»
او قیرمیزی پارچانی کؤینک جیبیمه قویوب ، قوهوملاریم ایله بیرلیکده سینمانین ایچریسینه گئتدیک . وئرلیش باشلامامیشدان اؤنجه ، اوتوردوغوم یئری دوستوما گؤستردیم کی منی راحات تاپا بیلسین ! بیر آزدان فئستیوال باشلانیب ، تئاتر اجرا اولدو ، سونرا شهریمیزین شارقیچیلارینین بیری تراختورا اوخودوغو شارقینی اوخودو ! سیرا منیم شعبده باز دوستوما چاتدی ! بیر _ ایکی اینانیلماز شعبده بازلیق ائتمه یینه گؤره تاماشاچیلارین آلقیشی سالونو بورودو ! سونرا اوستونه "یاشاسین تراختور" یازیلمیش اؤزونده کی قیرمیزی پارچانی چیخاردیب تاماشیچیلارا گؤستردی ! نم نه اویون بزه دی کی او پارچا بیردن بیره یوخ اولدو ! هامی تعجبله صحنه یه باخیردی ! دوستوم پارچانی یوخ ائدندن سونرا میکروفونو گؤتوروب دئدی : هر کیم ایستیر یوخ ائتدیییم پارچانی اونون کؤینک جیبیندن چیخاردام ، الین قالدیرسین !»
دوستوم دئین کیمی هامی الین قالدیردی ، من ده اونلارا قوشولوب ، یالاندان الیمی قووزادیم ! شعبده باز دوستوم تاماشاچیلارین ایچینه گیریب ، صحنه یه چیخماغا منی سئچدی ! قیرمیزی پارچانی کؤینه ییمین جیبیندن چیخاردیب ، جورابیما قویاندان سونرا آیاغا قالخیب صحنه یه دوغرو یولا دوشدوم . دوستوم اؤنجه میکروفونو منه توتوب ، آدیمی سوروشدو !
_ من ابوالفضل ثوابی 32 یاشیمن وار !
منی تانیمادیغینی ثابت ائتمه یه گؤره یالاندان دئدی : نمنه ؟ ابوالفضل سرابی بویوردون ؟ من یاخشی ائشیده بیلمه دیم ! بیرده بویورا بیلرسن ؟
_ سرابی یوخ ، ثوابی !
_ بعلی. آقای ثوابی ! ایندی او ایتیردیییم پارچانی سنین کؤینه یینین جیبیندن چیخاردا بیلرم می؟
_ نه بیلیم واللاه ؟ حتمن چیخاردا بیلرسن کی منی بورا چاغیریبسان دااای ! باشارا بیلسن ، چیخارت !
شعبده باز الین کؤینه ییمین جیبینه سالیب پارچانی آختاریردی آما پارچادان خبر یوخ ایدی ! اه ییلیب قولاغیما پیچیلدادی : آغای ثوابی ! پیس اوشاقلیغینا سالما ! بورا پیس اوشاقلیغین یئری دئییل !
_ سن اؤله سن ! سن منه ایسته دیییم شعبده بازلیغی اؤیرتمه دین دااای ، هه ؟ ایندی سنین ده منه ایشین دوشر یا یوووووووووخ ؟
دوستوم پارچانی منیم جیبیمدن آختارارکن ، تاماشاچیلار گولمکدن غش ائدیردیلر ! نقدر یالوار _ یاخار ائتدی ، پارچانین یئرین بیله سینه دئمه دیم! آختارماقدان یورولوب میکروفونو گؤتوروب تاماشاچیلارا بیر سؤز دئمک ایستیردی کی ، میکروفونو الیندن آلیب دئدیم : عزیز تاماشاچیلار ! دوزدور بو شعبده باز دوستوموز ایندییه کیمی منی تانیماییب آما من اؤزوم ده شعبده بازام ! ایندی سیزین گؤزلرینیزین قاباغیندا ، دوستوموز یوخ ائتدییی پارچانی جورابیمدان چیخاردیب ، سیزلره گؤستره جه یم !»
تاماشاچیلار بیر طرفه ، شعبده باز دوستوم اؤزو ده مات _ مات منه باخیردی ! شعبده باز دوستومدان اؤیرندیییم شعبده بازلیقلارین بیر _ ایکیسین اجرا ائدیب ، تاماشاچیلاری ایناندیراندان سونرا ، او یوخ ائتدییی قیرمیزی پارچانی جورابیمدان چیخاردیب ، تاماشاچیلارا گؤستردیم ! هامی تعجبله منی آلقیشلاییب ، پارچانین اوستونده "یاشاسین تراختور" کلمه لرین اوخویوردولار !
فئستیوال قورتولاندان سونرا هامی مندن ایمضا آلیردی ، دوستوم تعجبله منیم یئنی تاپدیغیم طرفدارلاریما باخیب ، گولمه یین ساخلایا بیلمیردی !
پیس اوشاق www.pisushaq.blogfa.com
- وظیفه م ایدی عزت آغا ! منیم اخلاغیم بئله دیر ، سیزدن قاباقکی قونشوموزدا کؤچوب گئدنده ، قونشولارین هامیسی دیسک توتوب الین بئلینه قویوب باخیردیلار آما من یاردیم ائدیب تکیمه کامیونو یوکله دیم ! ایکی گونلوک دونیادیر دااا عزت آغا . آداما یاخشیلیق قالاجاق !
- آللاه ادبینی الیندن آلماسین کیشی !
یئنی قونشو ایله تئز صمیمی اولدوق . بیر ایکی گونون ایچینده گؤروشوب دانیشدیقجا ، عزت آغانین بورجلو دوشوب ائو - ائشییین ساتیب سووماغیندان چوخ اوزولدوم ! هر زاد بیر یانا ، اوغلونون دا تویو هفته سونو اولاجاق ایدی . یاغماسایدیم دا گورولداییب تویدا الیمدن گلن ایشی گؤرمه ییمه سؤز وئردیم کی چوخ دا نیگران اولماسین ، او دا اینانیب توی کارتلارینین پایلاماغین منیم بوینوما قویدو ! البته هله کارتلار آماده دئییلدی ، عزت آغادان چوخ من تله سیردیم ! اؤز دردیمی اؤتوروب اونون فیکرینده قالمیشدیم . آز قالیردی کی هفته چیخسین آما کارتلاردان خبر چیخمامیشدی ، ایشدن تازا یئتیشیب ائوده اوتورموشدوم ، هله چاییمدان بیر قورتوم ایچیب - ایچمه میش قاپیمیز دؤیولدو ! قاپینی آچیب عزت آغانی بیر تلیس الینده قاپیمین آغزیندا گؤردوم !
- سلام عزت آغا ! بو تلیس نه تلیسیدیر ؟
- توی کارتلاریدیر دا . صاباح گئجه اوغلانین تویودور داااااا
- تو . تو . توی کارتلاری ؟ بیر تلیس توی کارتی ؟ بویور ایچری . بویور . بویور . قاپی قاباغیندا پیسدیر .
بیر تلیس توی کارتین گؤردوکده او بیر قورتوم ایچدیییم چایین دا قندی بوغازیما قاچدی ! کیشی نه خبریندیر ؟ اولمایا تبریز اهلینه قوناقلیق وئره جکسن ؟ » دئدیم . عزت آغا منیم کارتیمی وئریب دئدی : بو سنین اؤز کارتین ! بو محله دن یالنیز سنی تانیرام ، سن ده یئنه صلاح بیلدییین قونشونو چاغیرا بیلرسن ! »
- یوووو . من گلسم ائله گؤرر . او بیری کارتلاری نجور پایلامالییق ؟
- چاغیردیغیم قوناقلار ، قدیم قونشولاریم ، زینب طرفی بیرده کی زینال طرفیدیر ! البته قیز ائویندن ده قوناقلاریمیز اولاجاق کی اونلارا دا کارت یازمیشام ! دوزدور هامیسینا زنگ آچیب تویا دعوت ائتمیشم آما رسمدیر توی کارتی طرفین قاپیسینا گئتسین یوخسا وب تویا گلمز !
- بلی . بلی . خولاصه من خیدمتینده یم . دئییرم عزت آغا بیر آز یوباندیریبسان هااااااا . بیر بئله کارتی نجور هامینین الینه یئتیرمک اولار ؟ یالنیز بیر گون واخت وار . اؤزو ده کی من سیزین فار - فامئلین ائولرین تانیمیرام آخی . بیر آز چتین اولاجاق داااااا . اولماسا منه آیری بیر ایش تاپشیریب توی کارتلارین اؤزون پایلا ! منیم صاباح واجیب ایداری ایشم وار ، گئتمه سم ایشیم یانار !
- یوخ دا منیم واختیم یوخدور ، سنین راحاتچیلیغینا خاطیر ائله ایش گؤرموشم کی هامیسی پایلاماسی بئش دقیقه نین ایشیدیر باااا ، کارتلاری پایلاییب گئدیب ایشینه ده یئتیش داااا ، من سنین ال - آیاغینی باغلامامیشام کی ، هر محله نین کارتین بیر باغلاما باغلامیشام ، آدرسی ده اوستونده یازمیشام ، سن هر باغلامی یازدیغیم آدرسه یئتیره جکسن ، طرف اؤزو اؤز کارتین گؤتوروب او بیری کارتلاری دا صاحیبلرینه یئتیره جک ! مثلن بو باغلامدا 56 کارت وار ، بو کارتلار قاباقجی قونشولاریمیزین کارتلاریدیر ، هامیسین " بهشتی " چاهارراهینداکی سیگار ساتانا وئره جکسن ، او کیشی گئجه لر بیزیم قدیم محله نین گؤزتچیسیدیر ، هامینی دا تانیر ، بیله سینه تاپشیرمیشام کی کارتلاری سندن آلیب صاحیبلرینه یئتیرسین !
- آهان . باشا دوشدوم .
- بو باغلام دا " کوی فرهنگیان " آدرسینه گئده جک ، اوچونجو بلوکدا ایلک قاتین زنگین چالیب کارتی باجاناغیم گیله وئره جکسن ، دوزدور باجاناقدان فامئل چیخماز آما بو نئچه کارتین دا صاحیبلرینه یئتیرمه یی او بوینونا آلیب !
- ساغولسون داااا . بو باغلامین دا اوستونده یازیبسان : شریعتی خیاوانی - شاطیر مورتوض .
- آی ساغوووول ! شاطیر مورتوض منیم دوغما - دوغار خالا اوغلومدور ! شریعتی خیاوانیندا یاغلی کوکه پیشیرر ، اورا شولوغ خایاوان اولدوغونا گؤره ، کوکه پیشیرمک ایله یامان اؤزون تاپیب ! توکانیندا اوستون تیکدیریب اوردا اوتورور ، شریعتی ده کیمدن شاطیر مورتوضو سوروشسان گؤرسه درلر !
- عزت آغا ! باخ گؤر بو کارتلار دا " توحید " خیاوانینا گئده جک ؟
- بلی . داییم گیل توحید خیاوانیندا اوتورارلار ، دؤرد ایلدیر کی گل - گئدیمیز یوخدور ، اونا گؤره کوچه نین آدی ایله پلاکلارین اونوتموشام آما باخسان آدرسده یازمیشام کی سول الدن ایکینجی کوچه ده آغ قاپی !!!
- آغ قاپی ؟ بلکه بو دؤرد ایلده قاپیلارین آیری رنگله رنگله ییبلر ! بیلمیرسن کوچه نین ایچینده نئچه نجی قاپیدیر ؟
- دوز دئییرسن هاااا . کارتین اوستونده یاز "سول الدن بئشینجی قاپی " ! 25 نفرین کارتیدیر ، گئدیب تاپانمازسان پیس اولار !
- یازدیم ! قیز طرفینین کارتلاری هانی ؟
- قیز طرفی " کوی بهشتی " ده اوتورارلار ، آدرسینده یازمیشام کارتلارین بیرینین اوستونه ! بو کارتلار دا گئده جک " گلپارک " دا بو یازدیغیم آدرسه ، بونلاری دا آپاراجاقسان " امام حسین " مئیدانیندا بو آدرسه ، بونلار دا کی " آذربایجان " بولواریندا یازدیغیم بو آدرسینکیدیر ، بونلار دا " اوستاد شهریار " بولواری . آدرسی ده اوستونده دقیق یازیلیب !
- دئییرم غزت آغا ! یاخشی ایش گؤروبسن ها ف یوخسا کارتلاری بیر به بیر هره نین کین اؤز قاپیسینا آپارسایدیق بیر آی چکردی !
کارتلاری عزت آغادان تحویل آلیب بیله سین یولا سالدیم ! ایندی بیر من ایدیم بیر ده بیر تلیس کارت ! گئجه یاریدان سوووشموشدو ، گؤردوم اوغلومون اوتاغینین چیراغی یانیر ، بیله سین چاغیردیم : آتابی ! آتابی ! »
- بلی آتا !
- نه ایش گؤرورسن اوغول ؟
- شنبه امتحانیم وار . درسه باخیرام !
- وای دده ! درسی نئیلیرسن اوغول ؟ اوخودون اولاجاقسان من داااااااا ! بیر دقیقه بورا گله بیلرسن ؟
آتابی اوتاغیندان چیخیب منیم یانیما گلدی . من ده آدرسلری بیله سینه توضیح وئرندن سونرا یالوار - یاخار ایله تبریزین نقشه سی ایله توی کارتلاری بیله سینه وئریب کارتلارین پایلاماغین اونون باشینا سالدیم ! آتابی کارتلارین آدرسین نقشه اوزویله چک ائدرک من ده اونون الیندن اکیلیب باشیمی آتیب یاتدیم کی سحر یوخویا قالمایام ! سحر چاغی آتابی مندن قاباق آییلیب کارتلاری گؤتوروب ائودن چیخمیشدی ! ایداری ایشلریمی یئر به یئر ائدندن سونرا ائوه قاییدیب اوز - گؤزومه صفا وئردیم ! قاش قارالمامیش عزت آغا گیلده اولمالی ایدیق .
آتابی هله قاییتمامیشدی ، خانیمین الیندن یاپیشیب عزت آغاگیله گئتدیک ، آغالارین مجلیسی اوست قاتدا ایدی ، ایچری گئدیب عزت آغاگیلین ایلک قوناغی اولدوق ، " کئفسیز مجید " ین ارکست قوروپو دا بیزدن بیر آز سونرا گلیب سازلارین کؤکلمه یه باشلادیلار ، شام واختی اولموشدو آما قوناقلاردان خبر یوخ ایدی ، عزت آغا ایله منیم گؤزوم قاپیدا قالمیشدی ! عزت آغانین صبری داشیب قولاغیما پیچیلداییب : دار گونده قوهوم - قونشو دا آدامی اونودارمیش ! الیم آشاغی اولدوغونا گؤره کیمسه قاپیمیزی آچمادی ! » دئیرکن آغلادی ! منیم ده گؤزلریم دولموشدو ، اولسون عزت آغا ! آللاه آدامی اونوتماسین ! من اؤلمه میشم کی . ایندی گئدیب اؤز قونشولاریمیزی تویا چاغیرارام ، ائله چالیب اوینایاجاغیق کی دردین یادیندان چیخسین کیشی ! »
قونشولاری چاغیرماق 10 دقیقه چکمه دی ، آتابی ده کارتلاری پایلاماقدان قورتولوب ایچری گلدی ، شامی یئییب جانا سینر توی توتدوق ! عزت آغانین خرجی باتسا دا ، خاطیره لی توی اولدو . گئجه یاریدان سوووشوب ائوه قاییداراق عزت آغا بیزی یولا سالاندا دئدی : یورولمایاسان عزیز قونشو ! دده بالا منیم بوینوما قارداشلیق حقی قویدونوز ! سیز گئدین استراحتینیزه یئتیشین من ده گؤروم نه داشی سالمالیام باشیما بو ایستکلی قوهوملاریم ایله ؟ بئله اولماز ، سحر چاغی هامیسینا زنگ ووروب گیلئیلیک ائده جه یم ! » عزت آغایا دیلدارلیق وئرندن سونرا ائوه گلیب یورقون دوشوب یاتدیق !
گؤزومو یوخو توتوب توتمامیش قاپینین سسینه یئریمدن دیک آتیلدیم ! سحر اولموشدو آما ائله یورقون ایدیم سانکی بیر ده یقه دیر یوخلامیشام ؛ من هن - هون ائدیب قاپیا چیخینجا ، زنگ بیر داها چالیندی ، گؤردوم آتابی هله یئتدی یوخونون ایچینده دیر ، زیققینا - زیققینا اؤزوم قاپینی آچماق زوروندا قالدیم ! قاپینی آچجاق یاخام دوشدو عزت آغانین الینه ، هویوخموشدوم !
- سلام عزت آغا ! نه اولوب کیشی ؟ منیم یاخامی نیه چکیب جیریرسان ؟ من سنه نئیله میشم ؟
- منیمله نه دوشمانچیلیغین وار ایدی ؟ . هن ؟ سنه نئیله میشدیم یئکه کیشی ؟ هئچ اوتانمیرسان ؟ بو نه قونشولوغو ، نه یولداشچیلیغیدیر ؟
- دئمیرسن کی نه اولوب ؟
- هئچ زاد ، ایستیردینم نه اولسون ؟ گئجه نی سحره کیمی فیدن یاتانمامیشام ، سحردن ده قوهوم - قونشویا زنگ ووروب ایسته میشم باسام یامانا ، گیلئیلیک ائدم کی اونلار منی قاباقلاییب دئییبلر : سن بیزه کارت گؤندرمه دین کی بیز ده گلک تویا ! » اولمایا اونلاری آتیبسان زیبیل قابینا !
- یوخ بابا ! قوی اوغلومو چاغیریم گؤروم !
بیزیم سسیمیزه آتابی گؤزلرین اووارکن قاپیا چیخدی ، جریانی بیله سینه تعریفله ییب دئدیم : اوغول! گئت نقشه نی گتیرگؤستر عمی جانا ، عمی جان گؤرسون کی نئجه دقیق نقشه اوزو ایله آدرسلری نیشانلاییب کارتلاری پایلاییبسان ! » آتابی گئدیب نقشه نی گتیریب عزت آغایا گؤستریب دئدی : من آدرسلری نقشه اوزویله پایلامیشام آما کارتی هانکی قاپیا آپاریردیم قبول ائله میردی ، زور ایله کارتلاری بیله لرینه وئریردیم ، بو نقشه بو دا سیز ، باخ گؤر من هاردا یاهالمیشام ؟ » عزت آغا نقشه یه باخیب آتابه یین قوپالاغین گؤتوردو ! یاخشی هله آتابه یین سرعتی چوخ ایدی یوخسا عزت آغانین الینه دوشسه یدی یازیق اولاردی ! عزت آغا سویو سوزولموش یانیما قاییتدی .
- باخ بیر . سنین اوغول بالان " لاله " ده کی امام حسین میدانینداکی قوهوملاریمین کارتین وئریب " ارم " ده کی امام حسین میدانیندا نم کیمه ، قاسیم داییم گیلین کارتلارین " قارا آغاج " داکی توحید خیاوانی یئرینه " طالقانی " ده کی توحید خیاوانیندا ایتیر باتیر ائدیب ، " زعفرانیه " ده کی کوی فرهنگیانین کارتلارین آپاریب وئریب " شام قازان " داکی کوی فرهنگیاندا نم هارا .
- من اؤلوم ؟
- یامان هوشلو - باشلی دده - بالاسیز واللا ! گئدیب شهرداری استخدام اولمالیسیز بااااااا سیز ، سیز اولماساز 20 ده تبریزه گلن توریستلر دووار دیبینده قالار .
- آخی بیز ده ده ائله گوناه یوخدور کی ، سن گئدیب تبریزین شهرداریندان شکایت ائده جکسن بااااااااا ، بیر یاندان تبریزین قدیمی آدلارین ده ییشیر ، بیر یاندان دا بیر آدی تبریزین نئچه منطقه سینه سئچیر !
منیم سؤزلریم عزت آغانی یوموشالتماق یئرینه ، بیله سین دلی ائتدی ، الینه گله نی آلیب باشینا چیرپیردی یئره ! گؤردوم آتابی ایله منه ده مشتری گؤزو ایله باخیر ، تئز آتابه یین قولوندان یاپیشیب آرادان جیردیق یوخسا ایکیمیزی ده آلیب باشینا یئره چیرپسایدی ، ایکیمیزینده قویوغوموز پارتلاردی !
درباره این سایت